فندق ما أنصح فيه بجنيف ومطعم انصح فيه فـ زيورخ

فندق ما أنصح فيه بجنيف ومطعم انصح فيه فـ زيورخ

فندق ما أنصح فيه بجنيف ومطعم انصح فيه فـ زيورخ

لله الحمد قضيت اكثر من اسبوع في سويسرا الرائعه توني من يومين وصلت هي كانت اخر محطه قبلها كانت بلجيكا والمانيا ولكسمبورغ وباريس ونانسي الفرنسيه وفي الاخير حبيبة قلبي سويسرا بس عندي بعض الملاحظات وبعدين بسوي تقرير صغيرون عن المناطق اللي زرتها



Booking.com: N’vY Manotel , جنيفا, سويسرا - 755 آراء النزلاء . احجز فندقك الآن!



هذا الفندق ماانصح اي حد يسكنه اول سبب ضيق الغرفه شي يلوع الكبد لان حاطين حوض السباحه جنب السرير ومضيق الغرفه ودورة المياه منفصله عن البانيو وصغيرررره بصراحه ماحبيته ابدا ابدا .. انا وزوجي كنا نداعم في الغرفه اذا مشينا من الضيق .. وللاسف انه اختياري انا لاني قلت حق زوجي بسوي نفس العرب المسافرون خلنا نقتصد وتحسفت لان كان يبي يحجز في الكمبنسكي وانا قلت هذا احسن



والسبب الاهم المنطقه اللي فيها هالفندق غير امنه ابدا ابدا ولاتحس نفسك في جنيف لانه في دواعيس .. فالليل مانصح اي حد يمشي في الشارع لان كله شباب سكارى وصراخ واللي امسوين فوضى كلهم مهاجرين محد من اهل البلد.. المنطقه انا متاكده ان فيها شي مب طبيعي شنو بالضبط ماعرف كل ليله نسمع صراخ في الشارع وفوضى مره شفت واحد مع ربعه يصرخون ويحذفون البرتقالي حق الشارع عرفتوه حق اعمال الطرق يشوتونه ويطير على درايش السيارات واصحابها مساكين نايمين وواحد منهم وقف في نص الشارع يصارخ بهستيريه ماعرف هم سكارى ولاشنو موضوعهم انا شفتهم من الشباك صوتهم في الغرفه عندنا حتى واحد في الشارع في سيارته ماخلوه يمشي واقفين في نص الشارع منتهين حدهم المنطقه سيئه ومافيها امان وانا اشوف جنيف اختربت لان المهاجرين حقين فرنسا ادخلوها للاسف .. حتى مسكين في تركي كبير في السن راعي مطعم قالنا واجد اهني يسون نفسهم شرطه حراميه يتصيدون العرب ويسرقونهم .. قعد ينصحنا وقعد يقولي امسكي زوجج عدل وانتو رايحين الفندق لان الساعه كانت 10 ونص تقريبا كنا رايحين مشي ومالومه يوم نصحنا المنطقه تخرع .. مكان الفندق في دواعيس يعني صدق يخرع مب امان وشفنا شلة سكارى هي نفسها اللي قلت لكم يصارخون نفسهم واحنا نمشي بس حظنا كانوا على الشارع الثاني يدي كانت على قلبي الحمدالله وصلنا الفندق بالسلامه وقلت لزوجي مستحيل نروح فالليل نتعشا مشي لازم سياره عقب ماشفت هالموقف وهالشله اللي تتمشى كل ليله عند الفندق .. بعد ماطلعنا غرفتنا صارت هالفوضى والهستيريا من نفس الشله ..





الحي اللي فيه هذا الفندق مش نظيف ابدا فيه شي شنو هذا ماعرفناه لان تجمع هالجاليات يشكك ان في شي مب طبيعي ومكانه ماينفع للسياحه ابدا



جنيف حلوه بس هالمهاجرين اللي ادخلوها خربوها بس ماانكر اني استمتعت لاني زرت مناطق جميله حولها .. اذا بتزورون جنيف وزيورخ بتحسون بالفرق الشاسع بينهم .. زيورخ ارقى بمراحل



لاني احبكم وانتو كلكم مثل هلي مابي حد فيكم يحجز في هذا الفندق ويصير له نفس الشي ابي الكل يستمتع وتكون سفره ممتعه .. يمكن في الصيف الوضع يكون غير ماعرف انا كتبت لكم اللي شفته





مطعم انصح فيه وبقوه في زيورخ



spice india



هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 1000x500 .





هذا هو صاحب المطعم الخلوق



جد انسان قمه في الاخلاق لابعد حد واكله لذيذ لذيذ لذيذ انصح فيه وبقوه استقبلنا احسن استقبال .. صادف وجودنا في الكريسماس وكل المطاعم تسكر بدري كلمنا مطعم الارز قال خلاص بنسكر الساعه كانت 9 وشوي يقول لانه وقت اعياد ومافي زباين واجد .. طلعنا رقم سبايس انديا من النت بالصدفه قال بتم فاتح انتظركم وصلنا له الساعه 10 تدرون تم فاتح مطعمه ينتظرنا لين وصلنا له حتى ماعرفنا وين مدخل المطعم كلمناه طلع لنا في المطر علشان يدخلنا .. مع ان احنا تاخرنا عليه لان كان مطر قوي والسواقه صعبه واحنا ماكنا دالين مكانه ومكانه مب بعيد عن الماريوت زيورخ قريب .. انسان قمه في الاخلاق .. حتى لما طلبنا زوجي اللي طلبه غير وانا غير فعلا حسينا ان اكلنا غير عن بعض مافي اي تشابه .. راح طبخ لنا الاكل فررش حتى تاخر شوي في المطبخ وهذا دليل جوده والخضرا فرش تو كان مقطعها مب خضار مجمده اكله لذيذ جدا جدا جدا انصح اي حد يروح زيورخ يزوره صدقوني ماراح تندمون.. للاسف احنا صدناه في اخر ليله ووعدناه نكتب عن مطعمه بعد ماجربنا اكله وشفنا اخلاقه العاليه معانا ووعدناه نزوره اذا رجعنا لزيورخ لانه يستاهل حتى مايجبركم تطلبون من المنيو يقول اي شي انتو تبونه انا بسويه لكم حده طيب



عنوانه



tel: +41(0)435576910

Mobile+41(0)789234379

www.spiceindia.ch

nordbrucke4

zurich8037



في نظري هذا المطعم احسن بمراحل ومليون مره من taj palace المطعم الهندي الثاني لانه فاشل بكل بكل معني الكلمه .. تصورو زوجي طلب اكله هنديه اسمها سابجي خضار وانا طلبت برياني خضار .. نفس الخضار الموجوده في السابجي هي نفسها في البرياني خضاره مجمده مب فرش ومب حلو الطعم ولحد يتعب نفسه يطلب طلب غير عن الثاني في الاخير النتيجه نفس الشي ونفس الخضار ونفس النكهه .. طلبت كاري ربيان الله لايروايكم الطعم مب طعم كاري مافي طعم اصلا وزوجي قاله انا انصحك علشان مطعمك ان الكاري اللي اتسويه مب طعم كاري وان مستوى الاكل مش اوكي وقاله احنا مب اول مره ناكل في مطعم هندي انصحه بذوق وبمحبه لانه كان طيب معانا بس بعد اكل المطعم مهم الواحد لما يجي يدفع يحب يدفع على شي يستاهل مب على اكل مايعجبه .. الطعم كان مب اوكي وحتى الربيان تخيلو ماينقص احاول اقطعه بالسكين ماينقطع لاعت كبدي ماكلت الله يعز النعمه والفاتوره اربع ميه وشي قريب الخمس ميه ريال على شنو ياليت الاكل عدل.. حسيت راعي المطعم تضايق ماتقبل النقد مانصح حد فيه حتى شفنا عيله هنود كل واحد يطلب طلب قعدت اضحك اقول حق زوجي مادري اقوم اقولهم لاتعبون نفسكم في الاخير كلكم نفس الاكل ونفس الطعم بس اللون غير تعبوا نفسهم في الطلب على الفاضي روحوا سبايس انديا وانتو مغمضين وبتحسون بنفسكم بالفرق الشاسع بينهم ..



زوجي قالي لاتذمينه في المنتدى يقول حرام تقطعين رزقه .. انا اشوف انه بالعكس احنا هنا في المنتدى لازم نظهر الجانب الشين والزين يمكن اكله يعجب غيري بس انا ماعجبني ولاعجب زوجي الناس اذواق وانا ماشوف مذمتي للمطعم بتقطع رزقه اكيد في ناس تحب اكله والرزق بيد الله مب بيد اي حد فينا



وان شاءالله بس افضى راح اسويلكم تقرير صغيرون عن مجيف والاماكن اللي رحت لها

المصدر: منتدى المسافر العربى - من قسم: المسافر العربى سويسرا والنمسا

http://ift.tt/1mEI3RU